சத்தியநிர் வாணத்தாற் றற்போதத் தாக்கறுத்து
வைத்து வழி காட்டு மறைப்புலவன் – சுத்தன்
றமிழ்க்குரிசிற் சீகாழிச் சம்பந்த னென்பா
னெமக்கருளிச் செய்த திது.
(இ-ள்.) சத்திய நிர்வாணத்தால் தற்போதத் தாக்கு அறுத்து வைத்து வழிகாட்டும் – சத்திய நிர்வாணத்தீக்கையால் எனது போதத்தை ஒன்றோடும் பற்றாது ஒழித்துச்சிவத்தோடு இரண்டறக்கலக்கவைத்து என்பால் வந்தடைந்தோர்க்கும் எனதுள்ளே தாமே நிறைந்திருந்து முத்தி நெறியை அறிவிக்கும்.
மறைப்புலவன் சுத்தன் தமிழ்க்குரிசில் சீகாழிச் சம்பந்தன் என்பான் எமக்கு அருளிச்செய்தது இது – வேதங்களை எல்லாம் ஓதாமல் உணர்ந்த ஞானப்புலவர், மும்மலங்களையுங் கடந்து நின்ற நின்மலர், தமிழினது இலக்கணமெல்லாம் அளவிட்டறிந்த தமிழ்வேந்தர், சீகாழியென்னுந்திருப்பதியில் எழுந்தருளியிருந்த திருஞானசம்பந்தப்பிள்ளையாரென்று யாவரும் புகழாநின்ற சுவாமிகள், எம்போல்வார் வீடடைந்து உய்யும் நிமித்தம் அருளிச்செய்தது இந்நூலின் அருத்தம்.
(வி-ரை) இந்நூல் பிறர்க்கு உபகாரமாகக் கூறினமையால், “வழிகாட்டும்’’ என்பது பிறர்க்கெனக்கொள்க. “மறைப்புலவன்’’ “தமிழ்க்குரிசில்” என்றமையால், உபய கலைகளையும் உடையாரென்றறிக. இத் திருவெண்பாவால் நூன் மரபு கூறியவாறு காண்க.